ജീസസ് യൂത്തിലെ സാധ്യതകൾ മറ്റുള്ളവർ അറിഞ്ഞിരുന്നെങ്കിൽ! (MJYR053)
ജീസസ് യൂത്തിലെ സാധ്യതകൾ മറ്റുള്ളവർ അറിഞ്ഞിരുന്നെങ്കിൽ !!
യുവജന കഴിവുകളുടെയും നേതൃവാസനയുടെയും ഉത്തമ രൂപീകരണ വേദിയാണ് ഈ മുന്നേറ്റം
(By Dr. Edward Edezhath - Published in Kairos Malayalam in 2020)
“ഒരു മത്സ്യബന്ധന കുടുംബ പശ്ചാത്തലത്തിൽ നിന്നാണ് ഞാൻ വരുന്നത്; അതിൻറെ എല്ലാ പരാധീനതകളുമായാണ് ഞാൻ വളർന്നത്. പക്ഷേ ഇതൊന്നും സ്വപ്നങ്ങൾ കാണുന്നതിന് എനിക്ക് തടസ്സമായില്ല.” സാബിൻ ഏറെ താല്പര്യത്തോടെയാണ് തൻ്റെ ജീവിതയാത്ര എന്നോട് വിവരിച്ചത്. “ഒരു പുതിയ പള്ളിയിൽ ചെന്നാൽ മൂന്ന് കാര്യങ്ങൾ പ്രാർത്ഥിക്കണം - എൻറെ അപ്പൻ എന്നോട് പറയുമായിരുന്നു”. അങ്ങനെ അവനെന്നും മൂന്ന് കാര്യങ്ങൾക്കായി പ്രാർത്ഥിക്കുമായിരുന്നു. ഒന്ന്, വിലപിടിപ്പുള്ള ഒരു ക്യാമറ വാങ്ങിക്കണം; രണ്ട്, ഒരു ചായാഗ്രാഹകൻ ആയി തീരണം; പിന്നെ, ഒരു ഉന്നത മാധ്യമപ്രവർത്തനം ചെയ്യണം.
കടപ്പുറത്തെ ഒരു എളിയ ബാലന്റെ ഈ വലിയ സ്വപ്നങ്ങളെ കുറിച്ച് ആരെങ്കിലും കേട്ടിരുന്നെങ്കിൽ അവർ കളിയാക്കി ചിരിക്കുമായിരുന്നു. അതുകൊണ്ടുതന്നെ അവൻ ആരോടും ഇതൊന്നും പങ്കു വച്ചില്ല. “എൻറെ ജീവിതത്തിൽ വലിയൊരു വഴിത്തിരിവായി തീർന്നത് ഒരു സജീവ ജീസസ് യൂത്ത് കൂട്ടായ്മയിലേക്കുള്ള കടന്നുവരവാണ്. ഇന്ന് എനിക്ക് 23 വയസുണ്ട്. ഇതിനിടയിൽ തന്നെ വിശ്വസിക്കാക്കാനാവാത്ത രീതിയിൽ വിലപിടിപ്പുള്ള ഉപകരണങ്ങൾ കൈകാര്യം ചെയ്യാനും, ഛായഗ്രഹണ കഴിവിൽ മുന്നേറാനും ഉന്നത മാധ്യമ സൃഷ്ടികൾ നടത്താനും എത്ര നല്ല അവസരങ്ങൾ എനിക്ക് ലഭിച്ചിരിക്കുന്നു. ഇതെല്ലാം സംഭവിച്ചത് മനുഷ്യർക്ക് ചിന്തിക്കാൻ പോലും സാധിക്കാത്ത രീതിയിൽ എനിക്ക് ഈ മുന്നേറ്റത്തിൽ ലഭിച്ച സാധ്യതകളും ഇവിടെ നിന്ന് കിട്ടിയ ബന്ധങ്ങളും കൊണ്ട് തന്നെയാണ്.”
നഴ്സറിയിൽ വളരുന്ന ചെറുതൈ പോലെ
പഴയ ചില ഓർമ്മകൾ: 1978 ഫെബ്രുവരിയിലായിരുന്നു ആദ്യത്തെ ഒരു വലിയ നേതൃ പരിശീലനം. അതിൽ പങ്കെടുക്കുന്നവർ എല്ലാം പ്രത്യേക ഒരുക്കത്തോടെ കൂടി വരണം എന്നുള്ള ഒരു നിർദ്ദേശവും ഞങ്ങൾ മുന്നോട്ടുവെച്ചു. അന്ന് 16 സോണുകളാണ്. ഓരോ സോണിൽ നിന്ന് വരുന്ന നേതാക്കളും ഒത്തുകൂടി എന്തെങ്കിലും ക്രിയാത്മക അവതരണവുമായി വരണം എന്നായിരുന്നു നിർദ്ദേശം. എറണാകുളത്തു നിന്ന് പോയ ഞങ്ങൾ "എൻറെ വിളി" എന്ന പേരിൽ ഒരു ലഘു സംഗീത നാടകം തന്നെ ഒരുക്കി. എല്ലാ സോണുകളിൽ നിന്നുള്ളവരും എന്തെങ്കിലും ഒക്കെ അവതരണങ്ങളുമായി അവിടെയെത്തി. അത് വളരെ ചെറിയൊരു കാൽവെയ്പ് ആയിരുന്നിരിക്കാം, പക്ഷേ ഭാവിയിലേക്കുള്ള ഒരു സുപ്രധാന സൂചനയായി തീർന്നു. മറ്റു പല നവീകരണ കൂട്ടായ്മകളും പ്രാർത്ഥന പ്രഘോഷണം എന്നിവയിൽ മാത്രം ശ്രദ്ധിക്കുമ്പോൾ ജീസസ് യൂത്ത് പ്രവർത്തനങ്ങളിൽ താലന്തുകൾക്കും ഒരു പ്രത്യേക സ്ഥാനമുണ്ട്. ഇതിൻറെ പുറകിലുള്ള ദർശനം എന്താണ്? ദൈവദത്തമായ ദാനങ്ങൾ തിരിച്ചറിഞ്ഞ് വളർത്തുക എന്നുള്ളത് പ്രാർത്ഥനയിലും വിശുദ്ധിയിലും വളരുന്നതുപോലെ തന്നെ പ്രധാനപ്പെട്ടതാണ്.
" ജീസസ് യൂത്ത് 85" എല്ലാവർക്കും ഏറെ അവിസ്മരണീയമായി തീർന്നതിന് പല കാരണങ്ങൾ ഉണ്ടായിരുന്നു. രസകരമായ ഒരുക്കത്തോടെയാണ് അവരെല്ലാം എത്തിയത് എന്നുള്ളത് മാത്രമായിരുന്നില്ല അതിനു കാരണം, അവിടെ കാണാനായ അപ്രതീക്ഷിതമായ നിറവും, സ്വരവും, ആനന്ദവും ഒക്കെ അതിനെ ഒരു വഴിതിരിവാക്കി തീർത്തു. അവിടെ ദർശിച്ച വിവിധ കഴിവുകളുടെ പ്രകടനവും സ്വന്തം സാധ്യതകളുടെ ആഴത്തിലുള്ള അവബോധവും ഒക്കെ എല്ലാവര്ക്കും ഒരു പുത്തൻ സന്തോഷവും പ്രതീക്ഷയും നൽകി. നല്ല കാര്യങ്ങളുടെ തുടർച്ചയാണല്ലോ ജീസസ് യൂത്തിന്റെ ഒരു തനിമ. അന്നുമുതൽ ഓരോ ജീസസ് യൂത്ത് പരിപാടിയും വിവിധ തലന്തുകൾ ഉള്ളവരുടെ ഒന്നിച്ചുവരവിനും അവർക്ക് സ്വപ്നം കാണാനും പരിശീലനം നടത്താനും പലതും അവതരിപ്പിക്കാനും ഒക്കെയുള്ള സുന്ദരമായ അവസരങ്ങളായി തീർന്നു.
യുവജനങ്ങൾ ജീസസ് യൂത്തിൽ കടന്നുവരുമ്പോൾ ആകർഷകമായ എന്തൊക്കെയോ അവരവിടെ കാണാറുണ്ട്. സംഗീതത്തിൽ താല്പര്യമുള്ളവർ റെക്സ് ബാന്റ് തുടങ്ങി പല സംഗീത ഗ്രൂപ്പുകൾ കാണുന്നു, കല ഇഷ്ടമുള്ളവർ എക്സിബിഷനുകളും സുന്ദര സ്റ്റേജ് ഒരുക്കങ്ങളും ദർശിക്കുന്നു. എഴുത്തുകാർ ശ്രദ്ധേയമായ ബ്രോഷറുകളും കൈറോസ് മാസികയുമൊക്കെ കാണുന്നു, നൃത്തം അഭിനയം തുടങ്ങിയവയിൽ ഹരമുള്ളവർക്ക് പ്രോഗ്രാമുകൾക്കിടയിലെ സ്കിറ്റുകളും മറ്റും, ഓൺലൈൻ വേദികളിൽ കയറിയാൽ അവിടെയും ക്രിയാത്മക ജെ-വൈ സാന്നിദ്യം ധാരാളം. ചുരുക്കത്തിൽ മുന്നേറ്റത്തിൽ വരുന്ന യുവജനങ്ങൾക്ക് കഴിവുകൾ വളർത്താൻ എത്രയോ വേദികൾ! അതിലുമുപരി മിഷനറി ദൗത്യമെന്ന വ്യക്തമായ ലക്ഷ്യവും.
താലന്തുകൾക്ക് നൽകുന്ന ഊന്നലുകളുടെ ഫലമോ? വർഷങ്ങളിലൂടെ കഴിവുകളിൽ വളർന്ന അനേകർ, സുന്ദരമായ എത്രയോ സംരംഭങ്ങൾ, വിവിധ മേഖലകളിൽ നേതൃത്വം തെളിയിച്ച വലിയൊരു നിര സ്ത്രീ പുരുഷന്മാർ ഒക്കെ ഈ മുന്നേറ്റം സംഭാവന ചെയ്തിരിക്കുന്നു. ഒരു കാര്യം തീർച്ച, ഈ മുന്നേറ്റത്തിൽ മനുഷ്യരെ സ്വയം കണ്ടെത്താൻ സഹായിക്കുന്ന, വളർച്ചയുടെ പാതയിലേക്ക് അവരെ തൊടുത്തുവിടുന്ന എന്തോ ഒക്കെ ഉണ്ട്. അവിടെ ഉയരുന്ന ഒരു ചോദ്യം, താലന്തുകൾ പെരുകാൻ സഹായിക്കുന്ന ഈ പ്രധാന ഘടകങ്ങൾ എന്തൊക്കെയാണ്?
• ക്രിയാത്മക രീതിയിൽ യേശുവിനെ പരിചയപ്പെടുത്തുന്നതിലൂടെയാണ് ആളുകൾ മുന്നേറ്റത്തിലേയ്ക്കു കടന്നുവരുന്നത്
• പക്വതയിൽ വളരാനും ആന്തരിക സംഘർഷങ്ങൾ മറികടക്കാനും അങ്ങനെ ക്രിയാത്മക സാധ്യതകൾ പുറത്തുകൊണ്ടുവരാനും സഹായിക്കുന്ന ഒരു അന്തരീക്ഷം കൂട്ടായ്മകളിൽ ലഭ്യമാക്കുന്നു
* മറ്റു സ്ഥലങ്ങളിൽ ഒരാളുടെ കഴിവും അയാളെക്കൊണ്ടുള്ള ഉപയോഗവും മാത്രം പരിഗണിക്കുമ്പോൾ, ഇവിടെ വ്യക്തിക്കും സാകല്യ വളർച്ചയ്ക്കും പ്രത്യേക ശ്രദ്ധ കിട്ടുന്നു.
• തുടക്കക്കാർക്ക് പോലും വിദഗ്ധരോട് ഏറെ സ്വാതന്ത്ര്യത്തോടെ ഇടപഴകാനും പരസ്പര സ്നേഹവും അംഗീകാരവും കിട്ടുന്നതിനും ജീസസ് യൂത്ത് കൂട്ടായ്മകൾ പ്രത്യേകിച്ച് വലിയ സമ്മേളന ഒരുക്കങ്ങൾ നല്ല അവസരങ്ങളാകുന്നു.
• യാതൊരുവിധ പ്രതിഫലമോ പാരിതോഷികമോ പ്രതീക്ഷിക്കാതെ പ്രൊഫഷണലുകൾ പോലും ഒന്നിച്ചുവന്നു പ്രവർത്തിക്കുന്നത് മുന്നേറ്റത്തിന്റെ ഒരു പ്രത്യേക നന്മയാണ്.
ഫോൺ സംഭാഷണം അവസാനിപ്പിക്കുന്നതിനു മുൻപ് സാബിൻ എന്നോട് പറഞ്ഞു “ഇന്നത്തെ യുവജനങ്ങൾ അവരുടെ സ്വപ്ന പരിശീലനം നേടുന്നതിനായി എത്ര വലിയ സംഖ്യ മുടക്കാൻ തയ്യാറാകുന്നു. അതു കഴിഞ്ഞിട്ട് ഒരു എക്സ്പെർട് മാർഗ്ഗനിർദ്ദേശം കിട്ടാൻ, പിന്നെ ഒരു അവസരത്തിനായി എവിടെയെല്ലാം അന്വേഷിച്ചു നടക്കുന്നു. എനിക്ക് അതൊന്നും സാധ്യമാകുമായിരുന്നില്ല പക്ഷേ ജീസസ് യൂത്ത് ഗ്രൂപ്പുകളിൽ എത്രയോഅവസരങ്ങൾ! വളരാൻ എന്തെല്ലാം വേദികൾ! പുറത്തെല്ലാം ഒരു നല്ല അവസരം കിട്ടാൻ നമ്മൾ മറ്റുള്ളവരെ എന്തുമാത്രം പ്രീണിപ്പിക്കണം. എന്നാൽ ഇവിടെ ഏറെ സമൃദ്ധമായ അവസരങ്ങൾ ഉണ്ടെന്നു മാത്രമല്ല എല്ലാവരും നമ്മെ അംഗീകരിക്കുകയും പ്രോത്സാഹിപ്പിക്കുകയും ചെയ്യും. “ശ്രമിച്ചു നോക്കൂ! തെറ്റുപറ്റിയാൽ സാരമില്ല!" എന്നാണ് ഇവിടെ. മറ്റൊന്ന് കൂടെ, ഇന്നത്തെ സാഹചര്യങ്ങളിൽ ഏറെ കഴിവുള്ള അനേക യുവജനങ്ങൾ ചതിക്കുഴിയിലും അടിമത്തങ്ങളിലും ചെന്നു വീഴുന്നു. അങ്ങനെ അവരുടെ കരിയറും ജീവിതവും നശിക്കുന്നു. എന്നാൽ ജീസസ് യൂത്തിൽ ഉള്ളൊരു സുരക്ഷാ കവചം ഉണ്ടല്ലോ. കൂട്ടത്തിൽ ആരോഗ്യകരമായ ചില ശീലങ്ങൾ വളർത്തുന്നതിനുള്ള കുറേ അവസരങ്ങളും ഇവിടെ ലഭിക്കുന്നു.” ഒരു കാര്യം കൂടെ പറഞ്ഞു സാബിൻ ആ നീണ്ട സംഭാഷണം നിർത്തി, “ഞാൻ കൂട്ടുകാരെ ജീസസ് യൂത്തിലേയ്ക്ക് കൊണ്ടുവരാൻ ശ്രമിക്കുന്നത് ഈ വലിയ സാദ്ധ്യത കണ്ടിട്ടാണ്. അവർ ഓരോരുത്തരും മുന്നേറ്റത്തിൽ തുടരണമെന്ന് ഞാൻ ഏറെ ആഗ്രഹിക്കുകയും ചെയ്യുന്നു.”
Comments
Post a Comment